Front-artikolo (de Hodos)
Konsentite, mi plu verku front-artikolon.
Jes, de la pasinta numero de Vola Püg' (antaŭ longe, treeeee longe,
dum iu pratempo... sed ne timu, la gazeto ne mortis), mi ricevis
plurajn reagojn pri mia antaŭa frontartikolo kaj multaj el vi konfesis,
ke vi legis ĝin. Do, dankon pro viaj reagoj kaj mi dediĉas tiun-ĉi
front-artikolon al vi, karaj reagintoj. Vi konvinkis min daŭrigi
frontartikol-verkadon.
Ankaŭ pri la pasinta numero, mi menciu,
ke la kovrilo far Serge Sire de la 3-a numero iom skandaletis pro
la sura nud-virino. Oni akuzis nin pri seksismo. Do, ĉi-foje nia
desegnistino Liko egaligos la aferon per kovrilo kun ankaŭ viroj
nudaj. Tiel ni finfine regalos la okulojn de kaj inoj kaj malinoj!
Sed ekestas iu problemeto: se ankaŭ Vola Püg' iĝas skandalema
gazeto, ni iel "ŝtelos" unu plian moton de nia partnero
La KancerKliniko. Kompatinda LKK, ni jam prunteŝtelis parton de
ties desegnistoj, do se ankaŭ la skandaleman flankon ni invadas,
kien la mond'? En ĉi-numero, pri skandalemeco, krom la kovrilo,
ni ankaŭ informos vin pri la misfamaj VerdVarmĈiliPiproj, skandalema
muzik-bando, kiun nia gazeto vigle subtenas (ni ŝatas subteni novajn
artistojn promesplenajn).
Cetere, mi ĝojas anonci al vi, ke
aperis la nova PIV! Kion, vi vin demandas, ĉu jam nova eldono de
la Plena Ilustrita Vortaro? Neee, mi parolas pri la Plena Ilustrita Volapüg, la papera versio de Vola Püg' (ĉefredaktita de
la Platano kaj Tif). Jes, nun Vola Püg' ekzistas ankaŭ papere
(fek! unu plian komunan punkton kun LKK... Ĵak, mi petas, ne koleru
kontraŭ ni). Vi sopiris longe por ĉi-kvara numero, sed estis ĉar
ni pretigis la paperan version kaj ni volis aperigi ambaŭ versiojn
pli-malpli samtempe. Sed fakte, la papera versio aperis eĉ pli
frue ol la reta, ĉar la ĉefredaktisto de la reta (mi mem, jes)
pli pigris...
Sed ĉiukaze, ne plendu se la kvara numero de
Vola Püg' alvenas tiom malfrue ĉar ni ja jam anoncis, ke la gazeto
estas "ĉiu-iama": do ĝi aperas, kiam ni povas/volas.
Se vi volas esti avertita pri la apero de ĉiu nova numero, ne forgesu
aboni vin al la dissendolisto de la gazeto: ni sendas mesaĝon
nur je la apero de ĉiu nova numero (ne timu, ne temas pri unu plia
esperanto-diskutlisto, kie la listanoj debatadas senfine pri la
komo forgesita en iu pasinta mesaĝo).
Tamen, dum tiu longa
tempo da senVolaPügeco, la hejmpaĝo transpasis la 10 000 vizitintojn,
kaj ni ankaŭ ricevis plurajn komentojn kaj reagojn pri nia gazeto.
Interalie, ni fojfoje aŭdis kelkajn homojn diri: "Oh! Vola
Püg' ne estas mia stilo de humuro, ne estas mia kulturo, ktp.".
Sed eble mi devus reklarigi plian fojon la ĉefan celon de nia gazeto:
Vola Püg' estas unue libera platformo por ĉiaj esperantistaj humuristoj
kaj/aŭ desegnistoj. Ni tute ne intencas trudi iun specon de humuro,
ĉiuj rajtas partopreni (ni enretigas tion, kion oni sendas al ni).
Do, se vi opinias, ke via stilo de humuro ne estas sufiĉe reprezentata,
anstataŭ paŭt-fuĝi nian gazeton, ne hezitu mem kontribui al ĝi
por aldoni vian humuron aŭ insitigu viajn samhumurstilanojn partopreni!
Se vi desegnas aŭ volas diskonigi viajn humuraĵojn, la pordo estas
malfermata al vi: gehumuristoj el ĉiuj landoj, ni kuniĝu!
Nu, pri la enhavo de tiu kvara numero, kion diri? Sufiĉe plena
numero. Multaj novaj kontribuantoj (eĉ unu 10-jarulo: ni bonvenigu
Ivanon!) kaj ankaŭ novaj rubrikoj: filmemuloj ĝuu la Voĉojn el
la Pugo; Onjo Nanagr' instruos l'Esperanton; krom la Freneza Kokejo
ekestos nun ankaŭ la Freneza Bovino; kaj vi ĉion scios pri la
vivo de l'marsanoj. Pri la cetero, mi lasas vin mem malkovri...
Pfiuu, kiom longa front-artikolo, ĉu ne? Ĉi-foje, mi certas, ke
kelkaj ne kuraĝis legi ĝis la fino. Tamen, laŭ ĉies petoj, mi
plu verkos frontartikolojn. Ah, mi jam vidas kelkajn bedaŭri,
ke ili insitigis min plu frontartikolumi. Baldaŭ ili venos plorvoĉe
petegi al mi surgenue: "Oh, Henrri, ĉesigu viajn frontartikolojn,
mi petas! Ili estas neelteneble longegaj! Pensu pri niaj kompatindaj
okuletoj!". Bone, bone, mi provos fari pli koncize venont-foje...
sed mi ne promesas.
|
