Ĉu finfine aperis unu revuo en la lingvo Volapük ?

Ve, ne. Estas nur plia revuo en Esperanto...
Sed kial plia revuo en Esperanto ? Ĉar ĉi-tie, en Vola Püg', ni ne parolas pri :

• la lasta ĉiusemajna kunveno de la loka emeritaĝula Eo-klubo ;
• la kongreso de la esperantistaj insekt-kolektantoj ;
• la mencio de la vorto "Esperanto" sur iu murskribaĵo de necesejo en la norda stacidomo de Parizo ;
• la prelego pri perlumado de la venonta IJK ;
• la plej bona metodo pri kiel konvinki esperantistojn, ke Esperanto estas bona lingvo ;
• kaj nek pri la koloro de la kalsoneto, kiun L.L. Zamenhof surhavis dum la UK de 1913.

....sed pri multaj pli amuzaj aferoj.

Vola Püg' estas reta revuo, kies ĉefaj temoj estas : komiksoj, bildaĵoj kaj ĉiaj humuraĵoj !

Vola Püg' estas revuo ĉiutaga ĉiusemajna ĉiumonata ĉiujara....nu, ĉiu-iama. Se vi volas esti informata pri apero de ĉiu nova numero, vi povas ekaboni ĝin !
Kaj se la revuo plaĉas al vi, ne hezitu helpi nin reklami pri ĝi aldonante nian reklamilon en vian personan hejmpaĝon.
Por legi eksterkonekte la gazeton, vi ankaŭ povas elŝuti la tutan numeron (krom la pezegaĵoj, kiel ekz. la filmoj) je ZIP-formato klakante sur la jenan bildeton .

Vola Püg' celas arigi plej multe da esperantistoj desegnistaj, desegnemaj, desegnulaj, desegnantaj....kaj ĉefe humuremaj !

Do, se vi ŝatas ridi (sed ne ridigi), Vola Püg' estas por vi : tuj al legado !
Kaj, se vi ŝatas ridigi (kaj eventuale ankaŭ ridi), Vola Püg' bezonas vin !

Fakte, ĉiuj komiks- kaj/aŭ humur-emaj esperantistoj interesataj por partopreni al la redaktado de Vola Püg' estos bonvenaj. Por tio, sufiĉas sendi viajn kontibuaĵojn aŭ mesaĝon pri via intereso al redaktejo@volapug.net.

Kaj ĝuste pri la redakta teamo, jen kelkaj ekzempleroj da redaktantoj :

Kaj por ĉiuj aliaj komentoj, kritikoj, komplimentoj, rimarkoj, laŭdoj, insultoj, konsiloj kaj ĉiaj diraĵoj, ne hezitu skribi al ni !

N.B. : Kompreneble, ĉiu aŭtoro respondecas pri siaj opinioj.